Onless platformasidan foydalanish bo'yicha shartnoma

1.1. Ushbu Shartnoma O'zbekiston Respublikasining Fuqarolik kodeksi (FK), «Elektron tijorat to'g'risida»gi Qonun (O'RQ-792, 29.09.2022), «Iste'molchilarning huquqlarini himoya qilish to'g'risida»gi Qonun, «Shaxsga doir ma'lumotlar to'g'risida»gi Qonun (O'RQ-547, 02.07.2019), «Elektron hujjat aylanishi to'g'risida»gi Qonun, «To'lovlar va to'lov tizimlari to'g'risida»gi Qonun (O'RQ-578, 01.11.2019), Vazirlar Mahkamasining «Elektron tijoratni amalga oshirish qoidalari to'g'risida»gi 185-sonli qarori (02.06.2016) va boshqa amaldagi qonun hujjatlariga muvofiq tuzilgan.

1.2. Ushbu Shartnomada quyidagi atamalar qo'llaniladi:

Platforma

Operatorga tegishli bo'lgan, onless.uz domen nomi va uning subdomenlari (jumladan, kurs.onless.uz) ostida joylashtirilgan veb-sayt, mobil ilovalar va ularning barcha funksional qismlaridan iborat dasturiy-axborot majmuasi.

Onless

Platformaning haydovchilik guvohnomasini olishga nomzodlarni tayyorlashga mo'ljallangan asosiy mahsuloti bo'lib, O'zbekiston Respublikasida amaldagi imtihon markazlarining savol-testlariga tayyorgarlik ko'rish (mock-testlar va o'quv materiallari) imkonini beradi.

Akkaunt

Foydalanuvchi tomonidan ro'yxatdan o'tish natijasida yaratiladigan, Foydalanuvchining shaxsiy ma'lumotlari, foydalanish tarixi va obuna holati saqlanadigan shaxsiy kabinet.

Obuna

Onless mahsulotining pulli funksiyalaridan ma'lum muddat davomida foydalanish huquqini beruvchi, Foydalanuvchi tomonidan to'lov amalga oshirilgan paytdan boshlab kuchga kiruvchi pulli xizmat.

Kontent

Platformada joylashtirilgan barcha matnli, grafik, video, audio va interaktiv materiallar, jumladan savol-testlar, izohlar, qoidalar bayoni, video-darslar va boshqa o'quv materiallari.

Aksept

Foydalanuvchi tomonidan ro'yxatdan o'tish chog'ida «Foydalanish shartlariga roziman» degan tasdiqlash katakchasini belgilash orqali ushbu Shartnoma shartlarini qabul qilish harakati.

To'lov tizimi

Foydalanuvchi va Operator o'rtasidagi to'lovlarni amalga oshirish uchun foydalaniladigan, O'zbekiston Respublikasi Markaziy banki tomonidan litsenziyalangan to'lov tashkilotlari: Click, Payme va Operator tomonidan kelajakda qo'shiladigan boshqa litsenziyalangan to'lov vositalari.

Promo-kod

Operator tomonidan tarqatiladigan, Foydalanuvchi tomonidan to'lov chog'ida kiritilishi orqali Obuna narxiga chegirma yoki boshqa imtiyoz qo'llanilishini ta'minlaydigan maxsus belgili kod.

Ish kuni

O'zbekiston Respublikasida belgilangan dam olish kunlari va bayram kunlarini istisno qilgan holdagi har qanday kun.

Forsmajor

taraflarning irodasiga bog'liq bo'lmagan va oldindan ko'rib bo'lmaydigan, hech kim tomonidan oldini olish mumkin bo'lmagan favqulodda holatlar (tabiiy ofatlar, urush harakatlari, ommaviy karantin choralari, davlat organlarining cheklov qarorlari va shu kabilar).

1.3. Operator ushbu Shartnomaga o'zgartirishlar va qo'shimchalar kiritish huquqiga ega. Mohiyatli o'zgarishlar (jumladan, narxlarning oshishi, xizmat hajmining qisqarishi, qaytarish shartlarining o'zgarishi) Foydalanuvchiga elektron pochta, push-xabar yoki Platformaning shaxsiy kabineti orqali kamida 30 (o'ttiz) kalendar kun oldin xabardor qilinadi. Boshqa o'zgarishlar Platformada yangi tahrir e'lon qilingan paytdan boshlab kuchga kiradi.

1.4. Agar Foydalanuvchi mohiyatli o'zgarishlarga rozi bo'lmasa, u 30 kunlik ogohlantirish davri ichida amaldagi Obunasini bekor qilish va foydalanilmagan davr uchun mablag'ni qaytarib olish huquqiga ega. Ogohlantirish davri tugagandan keyin Platformadan foydalanishni davom ettirish — o'zgartirilgan shartlarni qabul qilganlik deb hisoblanadi.

1.5. Operator tomonidan har bir Foydalanuvchi aksept qilgan Shartnoma versiyasi va aksept sanasi-vaqti elektron ma'lumotlar bazasida saqlanadi va Foydalanuvchining yozma so'roviga ko'ra unga taqdim etilishi mumkin.

2.1. Operator Foydalanuvchiga Platforma va uning xizmatlaridan ushbu Shartnoma shartlariga muvofiq foydalanish huquqini taqdim etadi, Foydalanuvchi esa Shartnoma shartlariga rioya qilish va, pulli xizmatlardan foydalanish hollarida — belgilangan tartibda haq to'lash majburiyatini oladi.

Platforma quyidagi xizmatlarni taqdim etadi:

• O'quv kontent — haydovchilik imtihoniga tayyorgarlik ko'rish uchun savol-testlar, izohli javoblar va o'quv materiallari (Obuna asosida);
• Mock-testlar — amaldagi imtihon markazi formatiga yaqin tarzda tashkil etilgan sinov testlari (Obuna asosida);
• Foydalanuvchi shaxsiy kabineti, foydalanish statistikasi va natijalar tarixi;
• Operator tomonidan vaqti-vaqti bilan joriy etiladigan boshqa funksional imkoniyatlar.

2.3. Platforma haydovchilik guvohnomasini olganlik haqida sertifikat yoki rasmiy o'quv hujjati bermaydi. Platforma faqat tayyorgarlik (mock va learning) tizimi sifatida ishlaydi. Haydovchilik guvohnomasini olish jarayoni va rasmiy imtihon mustaqil ravishda O'zbekiston Respublikasida amaldagi imtihon markazlari tomonidan amalga oshiriladi.

2.4. Platformaning bepul funksiyalaridan foydalanish ushbu Shartnomani aksept qilish bilan cheklanadi. Pulli funksiyalardan (Obuna) foydalanish qo'shimcha tarzda amaldagi tarifga muvofiq to'lovni amalga oshirishni talab qiladi.

3.1. Platformaning xizmatlaridan foydalanish uchun Foydalanuvchi ro'yxatdan o'tishi shart. Ro'yxatdan o'tish quyidagi usullardan biri orqali amalga oshiriladi:

• Telefon raqami orqali — ism va telefon raqamini kiritish, SMS-kod bilan telefon raqamini tasdiqlash hamda parolni bir marta kiritish orqali;
• Google akkaunti orqali (OAuth 2.0 protokoli asosida; bu usulda parol Operator tomonidan so'ralmaydi, autentifikatsiya Google LLC tomonidan amalga oshiriladi).

3.2. Telefon raqami orqali ro'yxatdan o'tish chog'ida Foydalanuvchi Platforma tomonidan belgilangan minimal murakkablik talablariga javob beradigan parolni mustaqil ravishda yaratadi. Parol Operatorning ma'lumotlar bazasida ochiq ko'rinishda saqlanmaydi; u bir tomonlama kriptografik xeshlash (hashing) algoritmi yordamida o'zgartirilgan holda saqlanadi. Operator hech qachon, hech qanday holatda Foydalanuvchining paroli haqida so'rab murojaat qilmaydi.

3.3. Telefon raqami orqali ro'yxatdan o'tishda Foydalanuvchi ismi va telefon raqamini kiritadi. Familiya, otasining ismi, yashash manzili va tug'ilgan sana ro'yxatdan o'tish uchun talab qilinmaydi. Google orqali ro'yxatdan o'tishda Operator Google qaytargan identifikator, tasdiqlangan elektron pochta manzili, ko'rsatilgan ism va avatar ma'lumotlaridan foydalanishi mumkin.

3.4. Platformaning ayrim ixtiyoriy funksiyasi keyinchalik qo'shimcha ma'lumot talab qilsa, Foydalanuvchiga ma'lumot nima uchun kerakligi oldindan tushuntiriladi. Bunday ma'lumot ro'yxatdan o'tishni tugatish sharti hisoblanmaydi. Ro'yxatdan o'tish sahifasida ko'rsatilgan 24 soatlik bepul VIP sinov muddati talablarga mos, mustaqil ro'yxatdan o'tgan yangi o'quvchi akkauntiga bir marta beriladi; buning uchun to'lov olinmaydi va u avtomatik uzaytirilmaydi.

3.5. Foydalanuvchining yoshi bo'yicha cheklovlar:

• «A» toifa (mototsikl) haydovchilik guvohnomasiga tayyorgarlik ko'ruvchi nomzodlar uchun — 16 (o'n olti) yoshdan;
• «B» va boshqa toifalar uchun — 18 (o'n sakkiz) yoshdan.

3.6. O'zbekiston Respublikasi Fuqarolik kodeksining 27-moddasiga muvofiq, 14 yoshdan 18 yoshgacha bo'lgan voyaga yetmagan shaxslar tomonidan tuziladigan bitimlar (ushbu Shartnomani aksept qilish va pulli Obunani sotib olishni o'z ichiga oladi) ota-onasining, farzandlikka oluvchilarining yoki homiysining yozma roziligi bilan tuziladi. Voyaga yetmagan Foydalanuvchining qonuniy vakillari ushbu Shartnoma shartlari haqida xabardor bo'lishi va ularni qabul qilishi shart. Aks holda, voyaga yetmagan shaxs tomonidan kiritilgan ma'lumotlar va amalga oshirilgan to'lovlar uchun barcha javobgarlik uning qonuniy vakillariga yuklanadi.

3.7. Foydalanuvchi:

• Kiritilayotgan ma'lumotlarning haqiqiyligi, to'liqligi va to'g'riligi uchun shaxsan javobgar;
• Akkauntiga kirish ma'lumotlarini (telefon raqami, parol, SMS-kod, Google akkaunti) maxfiy saqlashi va uchinchi shaxslarga oshkor etmasligi shart;
• Akkaunti ostida amalga oshirilgan barcha harakatlar uchun shaxsiy javobgardir;
• Akkauntga ruxsatsiz kirilganligi aniqlansa, bu haqda Operatorga zudlik bilan xabar berishi shart.

3.8. Bir qurilma cheklovi. Foydalanuvchi Akkauntiga bir vaqtning o'zida faqat bitta qurilmadan (telefon, planshet, kompyuter) kirish huquqiga ega. Yangi qurilmadan kirilganida, oldingi qurilmadagi faol sessiya avtomatik ravishda yopiladi. Bu cheklov xavfsizlik va akkauntdan noo'rin foydalanishning oldini olish uchun belgilangan.

3.9. Bir Foydalanuvchi tomonidan bir nechta akkaunt yaratishga, shuningdek boshqa shaxsning shaxsiy ma'lumotlari yordamida ro'yxatdan o'tishga yo'l qo'yilmaydi. Bunday holatlar aniqlansa, Operator akkauntlarni bloklash va to'lovlarni qaytarmaslik huquqini saqlab qoladi.

3.10. Foydalanuvchi istalgan vaqtda akkauntini o'chirish so'rovini yuborishi mumkin. So'rov bajarilganda akkauntning faol funksiyalari to'xtatiladi; ma'lumotlarni o'chirish yoki qonunchilik talab qilgan qismini saqlash tartibi Maxfiylik siyosatida tushuntiriladi.

3.11. Foydalanuvchi o'z ma'lumotlariga doir murojaatni 6.8-bandda ko'rsatilgan elektron pochta manziliga yuborishi mumkin. Qonunchilikda saqlash majburiy bo'lgan ma'lumotlar tegishli qonuniy muddat tugaguniga qadar saqlanishi mumkin.

4.1. Tariflar va Obuna

4.1.1. Onless mahsulotining pulli funksiyalaridan foydalanish Obuna asosida amalga oshiriladi. Obunaning amaldagi muddatlari va narxlari Platformaning «Tariflar» bo'limida joylashtiriladi va shu bo'lim ushbu Shartnomaning ajralmas qismi hisoblanadi.

4.1.2. Barcha tariflar uchun taqdim etiladigan o'quv kontent va funksiyalar bir xil. Tariflar bir-biridan faqat foydalanish muddati va narxi bilan farqlanadi.

4.1.3. Operator IT Park rezidenti sifatida (rezident guvohnomasi DSP15) O'zbekiston Respublikasi Soliq kodeksiga va IT Park rezidentlari uchun belgilangan soliq imtiyozlariga muvofiq, qo'shilgan qiymat solig'i (QQS) to'lovchisi hisoblanmaydi. Shu sababli, «Tariflar» bo'limida ko'rsatilgan barcha narxlar yakuniy va QQS qo'shilmagan holatdadir.

4.1.4. Obuna avtomatik tarzda uzaytirilmaydi. Obuna muddati tugaganidan keyin, Foydalanuvchi o'z xohishiga ko'ra Obunani qo'lda yangi muddatga sotib olishi mumkin. Foydalanuvchining bank kartasi yoki boshqa to'lov vositasidan mablag' avtomatik ravishda yechib olinmaydi.

4.1.5. Bir nechta Obuna. Foydalanuvchi amaldagi Obunasi tugamasdan turib yangi Obuna sotib olishi mumkin. Bunda yangi Obuna muddati amaldagi Obuna muddatiga ustma-ust qo'shiladi. Masalan, agar Foydalanuvchining 30 kunlik obunasi qolgani 15 kun bo'lsa va u 90 kunlik yangi Obuna sotib olsa, umumiy Obuna muddati 105 kun bo'ladi.

4.2. To'lov tizimlari va to'lov tartibi

4.2.1. To'lovlar O'zbekiston Respublikasi Markaziy banki tomonidan litsenziyalangan quyidagi to'lov tizimlari orqali, milliy valutada — so'mda amalga oshiriladi:

• Click (Click Evolution MChJ);
• Payme (Inspired MChJ);
• Operator tomonidan kelajakda qo'shilishi mumkin bo'lgan boshqa litsenziyalangan to'lov tizimlari.

4.2.2. Karta ma'lumotlari. Foydalanuvchi kiritgan karta raqami, amal qilish muddati va SMS-kod to'g'ridan-to'g'ri tanlangan to'lov tizimiga yuboriladi, Onless (Operator) serverlariga kiritilgan shaklda yuborilmaydi. To'lovni amalga oshirish uchun Onless Payme'dan cheklangan ma'lumotlarni oladi: niqoblangan karta raqami, amal qilish muddati va tekshiruv holati. Foydalanuvchining to'liq karta raqami va SMS-kod Onless'da saqlanmaydi va jurnallarga yozilmaydi. Onless ichidagi Payme orqali bevosita to'lovda bir martalik token (save:false) ishlatiladi. Payme hujjatlariga ko'ra, bu token to'lovdan keyin Payme tomonidan o'chiriladi.

4.2.3. To'lov amalga oshirilgan paytdan boshlab, Operator Foydalanuvchining shaxsiy kabinetida tegishli Obunani faollashtiradi va elektron chek shaklida to'lovni tasdiqlovchi hujjat taqdim etadi (virtual kassa orqali Soliq qo'mitasining tizimiga onlayn rejimda uzatiladi).

4.2.4. Tanlangan to'lov tizimi (Click yoki Payme) o'zining to'lovni qayta ishlash infratuzilmasi va texnik xizmati uchun o'z foydalanish shartlariga muvofiq javobgardir. Operator Onless xizmatini ko'rsatish, xarid bo'yicha majburiyatlarni bajarish, VIP obunasini faollashtirish, shuningdek ushbu Shartnoma va amaldagi qonunchilikka muvofiq mablag'ni qaytarish hamda foydalanuvchini qo'llab-quvvatlash bo'yicha o'z majburiyatlari uchun javobgar bo'lib qoladi.

4.3. Promo-kodlar va aksiyalar

4.3.1. Operator vaqti-vaqti bilan promo-kodlar va chegirma aksiyalarini tashkil qilishi mumkin. Promo-kodning amal qilish muddati, qo'llaniladigan tariflar, chegirma miqdori va boshqa shartlari har bir promo-kod uchun alohida belgilanadi va Platformada e'lon qilinadi.

4.3.2. Promo-kodlar quyidagi qoidalar asosida ishlatiladi:

• Bir promo-kod faqat bitta to'lovga qo'llanilishi mumkin (agar promo-kod shartlarida boshqacha ko'rsatilmagan bo'lsa);
• Promo-kodlar pul shaklida qaytarilmaydi;
• Bir vaqtning o'zida bir nechta promo-kodni qo'llash mumkin emas;
• Operator promo-kod amal qilish muddatini, shartlarini yoki bekor qilishni istalgan vaqtda o'zgartirish huquqini saqlab qoladi (allaqachon qo'llanilgan promo-kodlarga ta'sir qilmaydi).

4.3.3. Promo-kod qo'llangan to'lovni qaytarish chog'ida (4.4-kichik bo'limiga muvofiq) Foydalanuvchiga aslida to'langan mablag' (chegirma qo'llanilgandan keyingi summa) qaytariladi.

4.4. 24 soatlik qaytarish kafolati

4.4.1. Foydalanuvchi Obunani sotib olgan paytdan boshlab 24 (yigirma to'rt) soat ichida xizmatdan norozi bo'lsa, quyidagi aloqa kanallaridan istalgan biri orqali Operatorga murojaat qilish orqali to'liq pul qaytarishni talab qilishi mumkin:

• Elektron pochta: [email protected]
• Telegram: @biznes_menejer
• Telefon: +998 97 280 08 09 (qisqa raqam: 972800809)

4.4.2. Murojaat qilish huquqi avval Akkauntdan to'lovni amalga oshirgan Foydalanuvchiga tegishli. Agar to'lov boshqa shaxs (masalan, ota-ona, qarindosh) kartasidan amalga oshirilgan bo'lsa, Akkaunt egasi sifatida murojaat qilish huquqi Akkauntdagi ro'yxatdan o'tgan telefon raqami yoki Google akkaunti egasiga tegishli.

4.4.3. Qaytarish bo'yicha murojaat qabul qilinganidan so'ng Operator:

• Foydalanuvchining Obunasini darhol to'xtatadi va Platformaning pulli funksiyalariga kirishni cheklaydi;
• To'langan mablag'ni 100% miqdorida, Operator tomonidan hech qanday komissiya yoki ushlanmalarsiz qaytarishni amalga oshiradi;
• Pul qaytarish to'lov amalga oshirilgan dastlabki to'lov vositasiga (bank kartasi, elektron hamyon va h.k.) bank yoki to'lov tizimining ichki qoidalariga muvofiq, qoida tariqasida, 3 (uch) — 30 (o'ttiz) kalendar kun ichida o'tkaziladi. Aniq muddat tegishli bank yoki to'lov tizimining qoidalariga bog'liq va Operator nazoratidan tashqarida.

4.4.4. Obuna sotib olingan paytdan boshlab 24 (yigirma to'rt) soat o'tganidan keyin kiritilgan qaytarish bo'yicha murojaatlar, ushbu Shartnomada belgilangan tartibga muvofiq, qabul qilinmaydi va to'langan mablag' qaytarilmaydi. Bu shart raqamli mahsulot (Obuna asosida taqdim etiladigan o'quv kontent) ning xususiyatlarini va Foydalanuvchining 24 soatlik muddat ichida xizmat sifati bilan tanishib chiqishga to'liq imkoniyati borligini hisobga olib belgilangan.

4.4.5. Texnik nosozlik, Operatorning aybi bilan xizmatga kirishning imkonsizligi yoki Platformaning e'lon qilingan funksional imkoniyatlarining sezilarli darajada mavjud emasligi hollarida pul qaytarish 24 soatlik muddat bilan cheklanmaydi va alohida tartibda ko'rib chiqiladi.

4.4.6. Ushbu bo'limning qoidalari «Iste'molchilarning huquqlarini himoya qilish to'g'risida»gi Qonunning Foydalanuvchi (iste'molchi) uchun belgilangan imperativ huquqlarini cheklamaydi.

5.1. Platformada joylashtirilgan barcha Kontent (matnlar, savol-testlar, izohlar, video-darslar, grafik elementlar, logotiplar, dasturiy ta'minot kodi va boshqa materiallar) Operatorning yoki tegishli huquq egalarining intellektual mulki hisoblanadi va O'zbekiston Respublikasining intellektual mulk to'g'risidagi qonun hujjatlari, jumladan Fuqarolik kodeksining IV bo'limi bilan himoyalangan.

5.2. Foydalanuvchiga Kontentdan faqat shaxsiy, notijorat maqsadlarda, Platforma doirasida foydalanish uchun cheklangan, qaytarib olinishi mumkin bo'lgan, eksklyuziv bo'lmagan litsenziya beriladi.

5.3. Foydalanuvchiga Operatorning yozma roziligisiz quyidagi harakatlarni amalga oshirish taqiqlanadi:

• Kontentni qisman yoki to'liq nusxalash, takror ishlab chiqarish, tarqatish, sotish, ijaraga berish yoki har qanday tarzda tijoriy maqsadlarda foydalanish;
• Kontentni boshqa veb-saytlarda, dasturlarda yoki ijtimoiy tarmoqlarda e'lon qilish;
• Kontentdan hosila asarlar (savol-test to'plamlari, qo'llanmalar va h.k.) yaratish va tarqatish;
• Avtomatlashtirilgan vositalar (bot, skript, parser va h.k.) yordamida Platformadan ma'lumotlarni yig'ish (scraping);
• Platformaning xavfsizlik mexanizmlarini chetlab o'tishga urinish, teskari injenering qilish.

5.4. Foydalanuvchi tomonidan Platformaga joylashtirilgan har qanday materiallar (sharhlar, baholar, fikr-mulohazalar) bo'yicha Foydalanuvchi Operatorga ushbu materiallardan Platforma doirasida bepul, muddatsiz va dunyo bo'yicha foydalanish huquqini taqdim etadi.

5.5. Foydalanuvchi tomonidan Platformaga joylashtirilgan izohlar nashr etilishidan oldin moderatsiyadan o'tkaziladi va sababini tushuntirmasdan rad etilishi mumkin.

6.1. Operator Foydalanuvchining shaxsga doir ma'lumotlariga O'zbekiston Respublikasining «Shaxsga doir ma'lumotlar to'g'risida»gi Qonuni (O'RQ-547-son, 02.07.2019), ushbu Shartnoma va e'lon qilingan Maxfiylik siyosati asosida ishlov beradi.

6.2. Telefon orqali ro'yxatdan o'tishda ism, telefon raqami, telefon tasdiqlangani haqidagi ma'lumot va parolning bir tomonlama kriptografik xeshi qayta ishlanadi. Parolning ochiq matni saqlanmaydi. Google orqali ro'yxatdan o'tishda Google qaytargan identifikator, tasdiqlangan elektron pochta manzili, ko'rsatilgan ism va avatar qayta ishlanishi mumkin.

6.3. Platformadan foydalanishda xavfsizlik jurnallari, qurilma va brauzerga oid texnik ma'lumotlar, sessiya ma'lumotlari, o'quv natijalari hamda pulli xizmat ishlatilsa to'lovga oid yozuvlar qayta ishlanishi mumkin.

6.4. Ma'lumotlarga quyidagi maqsadlarda ishlov beriladi:

• Foydalanuvchini identifikatsiya qilish va akkauntga kirishni ta'minlash;
• Platforma xizmatlari, o'quv natijalari va obunalarni taqdim etish;
• Xavfsizlikni ta'minlash, suiiste'mol va firibgarlikning oldini olish;
• To'lovlarni qayd etish hamda qonunchilikdagi majburiyatlarni bajarish;
• Foydalanuvchi so'ragan yordamni ko'rsatish;
• Egasizlantirilgan ma'lumotlar asosida xizmat sifatini tahlil qilish.

6.5. Ma'lumotlar akkaunt va xizmatni taqdim etish uchun zarur davrda, rozilikda ko'rsatilgan davrda yoki qonunchilik majburiy saqlashni talab qilgan muddatda saqlanadi. Maqsad tugagach va boshqa qonuniy asos qolmagach, ma'lumotlar o'chiriladi yoki egasizlantiriladi.

6.6. Xizmat ko'rsatish uchun zarur bo'lgan cheklangan ma'lumotlar SMS, autentifikatsiya, hosting, tahlil yoki to'lov xizmatini ko'rsatuvchi hamkorlarga berilishi mumkin. Ma'lumotlar, shuningdek, qonunchilik talab qilgan holatlarda vakolatli organga berilishi mumkin.

6.7. Foydalanuvchi o'z ma'lumotlari mavjudligi va tarkibi haqida bilish, ishlov berish haqida axborot olish, noto'g'ri ma'lumotlarni tuzatishni so'rash, qonunda ruxsat etilgan hollarda rozilikni chaqirib olish, ishlovni to'xtatish yoki ma'lumotni o'chirishni so'rash hamda vakolatli organga yoki sudga murojaat qilish huquqiga ega.

6.8. Ma'lumotlar bo'yicha murojaatni [email protected] elektron pochta manziliga yuborish mumkin. Batafsil ma'lumot amaldagi Maxfiylik siyosatida berilgan.

7.1. Operator quyidagilarga haqli:

• Platformaning funksiyalari, dizayni va texnik tuzilishini istalgan vaqtda o'zgartirish;
• Ushbu Shartnoma shartlarini buzgan Foydalanuvchining akkauntini ogohlantirish bilan vaqtinchalik to'xtatib turish yoki jiddiy buzilish hollarida bekor qilish;
• Profilaktika ishlari yoki texnik nosozliklar tufayli Platforma ishini vaqtinchalik to'xtatish (qoida tariqasida — oldindan ogohlantirish bilan, lekin shoshilinch holatlarda — keyinroq xabar berish bilan);
• Foydalanuvchi tomonidan kiritilgan ma'lumotlarning haqiqiyligini tekshirish maqsadida qo'shimcha tasdiqlash so'rovini yuborish;
• Promo-kodlar va aksiyalar shartlarini istalgan vaqtda o'zgartirish (allaqachon qo'llanilgan promo-kodlarga ta'sir qilmaydi).

7.2. Operator quyidagi majburiyatlarni o'z zimmasiga oladi:

• Platforma xizmatlarini sifatli va uzluksiz tarzda taqdim etish uchun oqilona harakatlar qilish;
• Foydalanuvchining shaxsga doir ma'lumotlarini qonun hujjatlariga muvofiq himoya qilish;
• Foydalanuvchi murojaatlariga belgilangan muddatlarda javob berish;
• 24 soatlik qaytarish kafolatini ushbu Shartnomada belgilangan tartibda bajarish;
• To'lovlar bo'yicha elektron cheklarni vaqtida shakllantirish va Soliq qo'mitasi tizimiga uzatish.

7.3. Foydalanuvchi quyidagilarga haqli:

• Platforma xizmatlaridan Shartnoma shartlariga muvofiq foydalanish;
• Texnik yordam va konsultatsiya olish;
• Ushbu Shartnomada ko'zda tutilgan hollarda pulni qaytarib olishni talab qilish;
• Akkauntini istalgan vaqtda o'chirish;
• Shaxsga doir ma'lumotlari bo'yicha qonunchilikda belgilangan barcha huquqlardan foydalanish;
• Operatorning xatti-harakati to'g'risida iste'molchilar huquqlarini himoya qiluvchi davlat organlariga murojaat qilish (10.4-bandga qarang).

7.4. Foydalanuvchi quyidagi majburiyatlarni o'z zimmasiga oladi:

• Ushbu Shartnoma shartlariga rioya qilish;
• Ro'yxatdan o'tish chog'ida haqiqiy va aniq ma'lumotlarni taqdim etish;
• Akkauntiga kirish ma'lumotlarini maxfiy saqlash;
• Platformadan qonun hujjatlariga, axloqiy normalarga va boshqa shaxslar huquqlariga zid bo'lmagan tarzda foydalanish;
• Platformaga, uning Kontentiga, boshqa Foydalanuvchilarga zarar yetkazishi mumkin bo'lgan harakatlardan (DDoS-hujumlar, zararli kod yuborish, ruxsatsiz kirish urinishlari va h.k.) tiyilish.

8.1. Taraflar ushbu Shartnoma majburiyatlarini bajarmaganlik yoki lozim darajada bajarmaganlik uchun O'zbekiston Respublikasi qonun hujjatlariga muvofiq javobgar bo'ladilar.

8.2. Operator quyidagilar uchun javobgar emas:

• Foydalanuvchi tomonidan Platforma xizmatlaridan foydalanish natijasida olingan natijalar (jumladan, Foydalanuvchining haydovchilik imtihonidan o'tishi yoki o'tmasligi);
• Foydalanuvchining Internetga ulanishi, qurilmasi, brauzeri yoki dasturiy ta'minoti bilan bog'liq texnik muammolar;
• Uchinchi shaxslarning o'z infratuzilmasi va texnik xizmatidagi nosozliklar (jumladan, Click, Payme, mobil operatorlar, Google LLC); bunda 4.2.4-bandda ko'rsatilgan Operatorning Onless xizmati, xaridni bajarish, VIP faollashtirish, mablag'ni qaytarish va qo'llab-quvvatlash bo'yicha majburiyatlari saqlanadi;
• Foydalanuvchi tomonidan akkaunt ma'lumotlarini uchinchi shaxslarga oshkor etish natijasida yuzaga keladigan zararlar;
• Forsmajor holatlari tufayli majburiyatlarning bajarilmasligi.

8.3. Operatorning Foydalanuvchi oldidagi mulkiy javobgarligi, qonun hujjatlarida belgilangan imperativ normalarni hisobga olgan holda, Foydalanuvchi tomonidan oxirgi 12 (o'n ikki) oy davomida Operatorga to'langan mablag'ning umumiy summasidan oshmaydi. Ushbu cheklov «Iste'molchilarning huquqlarini himoya qilish to'g'risida»gi Qonunning Foydalanuvchi uchun belgilangan imperativ huquqlarini cheklamaydi.

8.4. Platformada taqdim etilayotgan o'quv materiallari haydovchilik imtihoniga tayyorgarlik ko'rishga ko'maklashish maqsadida ishlab chiqilgan bo'lib, imtihondan muvaffaqiyatli o'tish yoki haydovchilik guvohnomasini olish kafolati hisoblanmaydi.

9.1. Taraflar Forsmajor holatlari tufayli ushbu Shartnoma majburiyatlarini to'liq yoki qisman bajara olmaganlik uchun javobgarlikdan ozod qilinadi, agarda bunday holatlar Shartnoma majburiyatlarini bajarishga bevosita ta'sir qilgan bo'lsa.

9.2. Forsmajor yuzaga kelgan tomon ikkinchi tomonni bu haqda 7 (yetti) kalendar kun ichida elektron pochta yoki Platformaning rasmiy aloqa kanallari orqali xabardor qilishi shart.

9.3. Forsmajor holati tasdig'i sifatida O'zbekiston Respublikasi Savdo-sanoat palatasi yoki boshqa vakolatli davlat organi tomonidan berilgan ma'lumotnoma qabul qilinadi.

9.4. Agar Forsmajor 60 (oltmish) kalendar kundan ortiq davom etsa, har bir tomon ushbu Shartnomani bir tomonlama tartibda bekor qilish va foydalanilmagan davr uchun pulni qaytarib olish huquqiga ega.

10.1. Ushbu Shartnomadan kelib chiqadigan har qanday nizo va kelishmovchiliklar, dastlab, taraflar o'rtasida muzokaralar yo'li bilan hal etiladi.

10.2. Foydalanuvchining yozma da'vosi (pretenziyasi) Operator tomonidan u qabul qilingan kundan boshlab 10 (o'n) ish kuni ichida ko'rib chiqiladi va asoslangan javob beriladi.

10.3. Muzokaralar yo'li bilan kelishuvga erishilmagan taqdirda, nizo O'zbekiston Respublikasi qonun hujjatlariga muvofiq vakolatli sud organlari tomonidan ko'rib chiqiladi.

10.4. «Iste'molchilarning huquqlarini himoya qilish to'g'risida»gi qonun hujjatlariga muvofiq, jismoniy shaxs bo'lgan Foydalanuvchi o'z yashash joyi bo'yicha sudga hamda iste'molchilar huquqlarini himoya qilish sohasidagi amaldagi vakolatli davlat organiga murojaat qilishi mumkin.

10.5. Shaxsga doir ma'lumotlar bo'yicha Foydalanuvchi ushbu sohadagi amaldagi vakolatli davlat organiga yoki sudga murojaat qilishi mumkin.

10.6. Elektron tijorat sohasidagi murojaat tegishli vakolatga ega amaldagi davlat organiga yoki sudga yuborilishi mumkin.

11.1. Ushbu Shartnoma Foydalanuvchi tomonidan aksept qilingan paytdan boshlab kuchga kiradi va Foydalanuvchining akkaunti faol bo'lgan butun davr mobaynida amal qiladi.

11.2. Foydalanuvchi istalgan vaqtda akkauntini o'chirish orqali ushbu Shartnomani bekor qilish huquqiga ega. Bunda Operatorning ushbu Shartnoma asosida vujudga kelgan, lekin bajarilmagan majburiyatlari saqlanib qoladi.

11.3. Operator Foydalanuvchining ushbu Shartnoma shartlarini muntazam ravishda buzganligi aniqlangan taqdirda, akkauntni bir tomonlama tartibda bekor qilish huquqiga ega. Bunda allaqachon foydalanilgan Obuna muddati uchun to'langan mablag' qaytarilmaydi.

11.4. Ushbu Shartnomaning birorta qoidasi qonun hujjatlariga zid deb topilsa, bu qoida o'z kuchini yo'qotadi, biroq Shartnomaning qolgan qoidalari to'liq kuchda saqlanib qoladi.

11.5. Ushbu Shartnoma O'zbekiston Respublikasi qonun hujjatlariga muvofiq tartibga solinadi va talqin qilinadi.

11.6. Ushbu Shartnoma davlat tilida — o'zbek tilida tuzilgan. Operator Shartnomaning rus va boshqa tillardagi tarjimalarini taqdim etishi mumkin, biroq nizolar yuzaga kelganda — o'zbek tilidagi matn ustun yuridik kuchga ega.

11.7. Ushbu Shartnoma bilan birga, Foydalanuvchi Platformaning «Tariflar» bo'limi va Maxfiylik siyosati (e'lon qilingan paytdan boshlab) bilan tanishib chiqishni va ularga rioya qilishni o'z zimmasiga oladi.